53. O ADN e os cromosomas

Que quere dicir que as cadeas de ADN se condensan? Cal é o resultado?
Quere dicir que as cadeas de ADN se compactan grazas á asociación de proteínas específicas denominadas histonas. A condensación do ADN ten lugar de forma natural para que o reparto de material xenético durante a división celular sexa realizado de forma correcta.

O grado de condensación máximo é o cromosoma.

Por que os cromosomas teñen aspecto de X? Son as X sempre iguais?
Os cromosomas teñen forma de X debido ao seu alto grado de compactación e a que, antes da condensación, cada cadea de ADN se duplica, isto é, fai unha copia idéntica de si mesma.

A forma de X non sempre é a mesma, xa que o centrómero divide ao cromosoma en dous brazos, que poden ter distinta lonxitude en función da posición do centrómero.

Busca tres exemplos de cariotipos doutras especies moi diferentes indicando o seu número de cromosomas. Hai algunha relación entre este número e o complexa que sexa a especie?
As miñocas teñen 36 cromosomas, mentres que os canguros teñen 16 e as pombas teñen 80, polo que se pode observar que non hai ningún tipo de relación entre o número de cromosomas dunha especie e a súa complexidade.

Que representa o debuxo de abaixo? Cal é o sexo dese individuo?
O debuxo de abaixo mostra o cariotipo humano dunha persoa de sexo masculino (XY).

Se o individuo padecese o síndrome de Down, como sería o seu cariotipo?
O síndrome de Down está causado pola presenza dun cromosoma de máis no par 21, polo que o individuo tería un cromosoma 21 adicional separado (trisomía 21).